【明報專訊】李克勤昨日於母校香港華仁書院，為錄影無綫特輯《李克勤30周年演唱會校園Live》進行綵排，老友梁榮忠擔任節目主持。克勤坦言今次拍要求外景，並提出找忠仔合作，但初時心存疑問，到底離開無綫多年的忠仔能否亮相，結果他致電無綫高層追尋答案﹕「余詠珊Check完話無事，原來是誤會一場，只是我們想多了。」

克勤幫手打通條路，忠仔會否考慮返無綫拍劇？克勤搶答﹕「無這件事，我只是打通了個電話，不過我見宣萱返來拍劇幾開心，又有4K拍攝。」身邊的忠仔聞言笑說﹕「怪不得我返到無綫啦，得閒要再通下淋巴，但我驚返來人工都得4K，哈哈，太長遠未想到，近大半年我做了旅遊達人，去不同地方工作，寫劇本做全職編劇，不過2017是重要年份，我和克勤在1992年合作節目至今認識25周年，又是他入行30周年，所以他叫我實來。」克勤又邀請忠仔參與其9月個唱，克勤說﹕「忠仔幫手度橋，但不要上台唱歌，怕他搶我鏡。」忠仔提議一齊跳舞表演，克勤笑說﹕「唔好趕客！」

記者：鍾一虹