65歲牛一 張華峰將申長者卡 兩蚊搭港鐵
[2017.05.03] 發表
【明報專訊】經民聯立法會議員張華峰噚日65歲生日，黨友林健鋒好有心，設宴請其他黨友及記者朋友同「肥老闆」慶祝，黨友石禮謙、梁美芬都向張華峰送上祝福。
張華峰平時有座駕出入代步，但佢話年滿65歲，諗住申請長者卡，得閒可以用兩蚊搭吓港鐵，仲話諗住拎長者卡去海洋公園玩𠻹。
張華峰嘅生日願望就好行貨，話想大家開開心心、社會團結喎，而佢心繫證券業界，想爭取交易市場第三板(主板、創業板外)盡快成立，仲話想快啲有新股通(即中港投資者都可以買賣對方市場發行嘅新股)，搞旺個股市。
不過，張華峰噚日嘅生日活動係返立法會坐定定開財委會，晚上同證券界朋友宴會，今晚先同家人食飯慶祝。
更多港聞
相關新聞
