【明報專訊】市民返工會用各種交通工具，致力提倡綠色運輸嘅專業議政立法會議員姚松炎(Edward)，近日就同公民黨楊岳橋、譚文豪同郭榮鏗合作拍片，喺早上8點鐘實測踩單車、搭港鐵同坐私家車由太古城去金鐘立法會嘅情况。3種方法喺時間、開支同環保上各有長短，Edward形容，全面可持續嘅城市規劃，需要綠色運輸，外國已經有單車友善政策，但港府仍然將單車嘅運輸功能貶低為消閒文娛活動，希望港府可以改變思維。

踩單車 姚松炎50分鐘到立會

Edward同郭榮鏗一齊踩單車，用咗50分鐘返到立法會，Edward話如果天氣好又夠早，踩單車既慳錢又環保，但市區馬路仍未配合單車代步；郭榮鏗就補充，由於馬路無單車線，所以道路繁忙時，一班人一齊踩就最安全。

譚文豪搭港鐵就用咗35分鐘，佢話如果有政策配合各種交通工具，市民就可以有慳錢又環保嘅交通組合。至於楊岳橋坐私家車最快，用咗32分鐘，但當然無咁環保啦。楊岳橋仲計過，話喺中西區揸車，一個月皮費其實夠買一部新嘅iPhone 7或326罐午餐肉喎。