劍擊教練落order 曾俊華學舞練韌力
[2017.03.11] 發表
【明報專訊】自稱「頭號薯粉001」嘅田北俊噚日喺佢主持嘅商台節目《田式生活》訪問特首選舉候選人曾俊華，唔講政治只講人生。田少喺節目一開始就「利申」，話自己都有請其他兩個候選人，但佢哋比較忙未有應承。
節目裏面，田少話曾俊華學打功夫唔奇，但好奇怪點解佢會去學舞；曾俊華話大學時係學校劍擊隊隊長，但教練覺得隊員韌力唔夠，所以要佢哋去學芭蕾舞，「所以我都有少少根柢」，畢咗業佢就識咗演員陳慧珊嘅爸爸，陳爸爸當時喺電視台做編舞，亦有一個舞蹈團，曾太都係舞蹈團成員，有次臨時拉伕搵人，佢先頂上。
講開細個讀書，田少讚曾俊華考入名校MIT(麻省理工學院)好叻仔，曾俊華就好謙咁話「我(讀書)麻麻哋，未考過第一，我第四都未考過」，不過佢考SAT唔錯，講吓講吓原來佢SAT數學滿分，英文都有成700分，連一向牙擦嘅田少聽完都話要轉話題，唔想再講落去。特首選舉候選人還包括林鄭月娥同胡國興。
更多港聞
相關新聞
