【明報專訊】一年一度嘅維園花卉展噚日開鑼，展出超過35萬朵花，包括約4萬朵主題花玫瑰，展期去到今個月19號。Emily留意到，原來今年西九管理局係首次參展，局方話參展嘅園藝以微型西九文化區做設計藍本，用一系列色彩繽紛嘅花、香草同灌木，呈現藝術公園、戲曲中心、自由空間同M+大樓等西九文化設施嘅發展。

唔知係咪因為工程仲做緊，Emily留意到花圃入面仲有啲吊臂喺度，又擺咗幾部平日喺西九文化區好受市民歡迎嘅單車，不過花展呢部單車係小型發電設施，踩車嗰陣會點亮M+博物館模型上面嘅顯示器。

另外，局方同Emily講，文化區入面嘅苗圃公園已經種咗超過100種樹，市民下載「西九樹木導賞」應用程式，掃一掃文化區內樹木上面嘅QR碼，就可以睇到嗰棵樹嘅特徵、棲息地同季節變化等資料。