兩美食車率先初七開檔 金紫荊賣刈包 尖沙嘴售菠蘿包
[2017.01.24] 發表
【明報專訊】等了又等，16部美食車中，其中8部成功符合申領牌照要求，噚日抽籤決定頭一個月喺邊度擺檔，最快下周五大年初七(2月3日)有得幫襯。率先開業嘅有主打美式刈包(刈，粵音艾)嘅大西洋未來(香港)，同主打鮮忌廉菠蘿包嘅天誠冰室，分別抽中喺金紫荊廣場同尖沙嘴梳士巴利公園，由年初七擺檔到2月19號，之後就會分別移師中環海濱同黃大仙廣場至3月5號。
其餘2至3月陸續開業
至於其餘6部美食車，包括樺得園、識得餃、魔廚撈麵等，都已經抽咗場地(見表)，但開張日子就間間唔同。商務及經濟發展局長蘇錦樑噚日都有出席抽籤活動，仲同經營者合照放上佢嘅facebook專頁。佢離開現場時話，會交畀經營者自己揀開張吉日。商經局其後補充，噚日未現身嘅其餘8部美食車組裝進度良好，稍後通過驗車程序，之後就會安排佢哋抽籤，預計2月至3月初陸續開業。
大西洋未來(香港)負責人黃偉文話，最期待去尖沙嘴擺檔，頭兩輪抽中嘅場地未算最滿意，好彩每部車都有機會輪流去勻全部場地，唯有寄望將來啦！佢仲畀咗張相Emily睇，原來佢同同事已經去咗觀塘海濱測試場地，美食車車身貼咗招牌熊貓卡通公仔(圖)。天誠冰室嘅美食車亦已經髹好漆，呢個禮拜貼埋卡通菠蘿公仔，就大功告成。
另外，部分美食車停泊位置被詬病冷清，其中迪士尼樂園原定停泊位置喺旅遊巴停車場，一般自由行或本地客根本唔會經過。樂園早前公布更改停泊地點，美食車將來可以泊喺行入樂園正門嘅必經之路。
更多港聞
4議員促新特首護一夫一妻制 何君堯：LGBT對家庭有毁滅性
【明報專訊】經民聯梁美芬、民建聯周浩鼎、自由黨邵家輝同獨立何君堯4名建制派立法會議員，近日同20多個反同或家長團體發起聯署，要求下屆特首必須... 詳情
【明報專訊】港鐵噚日抽出2月嘅生日之星，就係4年先可以慶生一次嘅2月29號生日嘅朋友仔喇，得獎者可以喺2月嘅周日，去大部分港鐵站嘅換領站或客...
詳情
學生送殯方聞中樂 教師心痛 正覺設館賞中華文化
【明報專訊】香海正覺蓮社佛教正覺中學剛開設中華文化館，教學生品茗、書法、國畫等，還收集了約50件仿文物展示中國傳統文化美德。該校課程發展主任... 詳情相關新聞
