【明報專訊】 熱血公民鄭松泰去年喺立法會會議倒插國旗，內會噚日就相關譴責動議嘅調查委員會選出委員，不過民主派集體杯葛，結果7個委員全部都係建制派，由經民聯梁美芬同獨立何君堯擔任正、副主席。鄭松泰會後話，同意民主派杯葛委員會，因為如果佢哋加入，就會令市民誤以為由建制主導嘅委員會會有公平調查，形容「西環契女」同「契仔」喺委員會係「一家團聚」咁話。 委員會完成調查後會將報告交上大會，由大會表決係咪通過譴責。梁美芬會後批評，民主派杯葛委員會係唔負責任，因為倒插國旗事件涉及行為守則，議員有責任維護議事廳莊嚴，批評民主派維護鄭松泰。鄭松泰就話唔擔心失去議席，相信民主派唔會支持譴責。 委員會成員包括自由黨邵家輝、工聯會陸頌雄、獨立陳振英、民建聯張國鈞同葛珮帆。噚日內會裏面，建制派曾經提名民主派加入委員會，但都被拒絕，其中民建聯劉國勳提名民主黨黃碧雲，黃碧雲拒絕接受，話議會時間珍貴，唔應該浪費用嚟調查「小學雞」行為。
|
| |
| |
;)
