【明報專訊】今年《施政報告》其中一項建議,係將「廣東計劃」、即係每月向移居廣東嘅合資格香港長者發放嘅現金高齡津貼,擴展至福建(即「福建計劃」)。工聯會郭偉強噚日喺記者會回應施政報告,就用略為生疏嘅福建話,向福建鄉親講聲「各位福建朋友,我爭取生果金福建計劃終於成功喇」,唔知身處福建嘅長者聽唔聽得明呢?
郭偉強話,工聯會喺政府實施廣東計劃後,已經馬上提出福建計劃,政府之前一直唔肯落實,到今年終於有成果。
另外,特首梁振英(CY)噚日發表報告時,除咗太太梁唐青儀同一班行會成員喺公眾席旁聽,曾參加立法會選舉、一直「撐CY」嘅陳玉娥(娥姐)都有捧場。社民連梁國雄喺CY入場時,高叫「梁振英,超級大話精」, 娥姐不甘示弱,喺公眾席回敬「梁國雄,超級大話精」,最終主席梁君彥除咗叫長毛肅靜,亦提醒公眾席人士唔可以胡亂喧嘩。