建制抽水 專登讀錯字 不知「馬首是膽」風波 長毛鬧錯人

建制抽水專登讀錯字不知「馬首是膽」風波長毛鬧錯人

[2016.11.19] 發表

【明報專訊】公民黨譚文豪早前喺立法會大會，將「馬首是瞻」讀錯做馬首是「膽」，畀人笑到面黃，去到噚日仍然畀建制派拎嚟抽水。話說噚日立法會開內會，討論成立調查特首梁振英涉收受UGL 5000萬嘅籌備委員會小組人數，建制派堅持維持11人規模，由於超額，最終長毛梁國雄唔能夠加入。長毛即刻發脾氣，話「你(建制派)都係要拎我人頭啫」，又將事件扯到去發展局副局長前日報警話佢搶文件，但佢一時諗唔起副局叫咩名，就話「馬咩？」(其實係馬紹祥)

建制派見到長毛唔識馬副局，就有人起哄，離遠回答係「馬首是膽」。睇嚟長毛完全唔知譚文豪讀錯成語呢件事，當場窒番對方，「咩膽呀，係瞻」，仲叫對方讀吓書先啦。不過今次認真係鬧錯對象，搞到建制派拍枱捧腹大笑。可惜Emily就望唔到當時譚文豪係咩表情。

查UGL委員會長毛毛孟靜出局

講番呢個委員會，會計界梁繼昌同民主黨尹兆堅，今個月初以呈請書方式要求成立專責委員會，調查特首梁振英收受澳洲UGL公司5000萬港元。其實內委會副主席郭榮鏗曾經提議，因報名人數有成13個，希望將就下，擴大個小組嘅規模。有泛民亦希望彈性處理，認為議題牽涉重大公眾利益。

不過建制派就要求跟慣例做，話如果多咗人報名就要加人數，以後會沒完沒了。最後喺建制派人數佔優之下，投票通過小組由11人組成，而委員當中，建制派有7人，包括梁美芬、黃國健、謝偉俊、馬逢國、何君堯、周浩鼎及容海恩；民主派只得4個，就係楊岳橋、梁繼昌、尹兆堅同林卓廷。多出嚟兩個，社民連梁國雄同本土毛孟靜就畀人「踢走」。