【明報專訊】民主派同建制派早前都冧人落去唔同嘅立法會事務委員會，為求鬥多人以爭奪委員會正、副主席之位，爭位戰告一段落，唔少議員爭完位就開始打退堂鼓退出委員會。衛生服務界立法會李國麟則一次過退出13個委員會。 噚日接議員退會19通知 根據立法會文件，民主派同建制派議員近日都積極退會。單係噚日已經有19份通知係關於議員退出委員會。李國麟退出嘅委員會「包羅萬有」，例如工商、教育、保安、福利、財經，以及司法及法律等。 保險界陳健波都退出兩個委員會，包括交通事務同民政事務委員會。經民聯石禮謙亦都退出食物安全及環境衛生，以及環境事務委員會。經民聯劉業強退出教育事務委員會，新民黨田北辰同民建聯陳恒鑌一齊退出工商事務委員會，工聯會麥美娟、郭偉強及何啟明就離開經濟發展事務委員會。 其實唔計內會、財會，單係事務委員會已有18個，正常一個議員加入六七個已算多，而班議員早排為鬥氣蜂擁報名加入，𠵱家就爭住退出。立法會工作開始上軌道後，相信退會潮陸續有來。
|
| |
| |
;)
