姚松炎收過1蚊選舉捐款

【明報專訊】立法會選舉喺上月完結，無論係落選定當選者都要喺下月8日或之前，向選舉事務處填妥有關選舉經費、選舉捐贈等嘅利益申報。Emily噚日睇過一班議員嘅申報表，發現獨立議員姚松炎收過公民黨1蚊捐贈，原來佢喺選舉日前夕(9月3日)用過公民黨電郵發採訪通知，所以就出現1蚊嘅象徵式行政費，而公民黨就將呢1蚊捐咗畀姚松炎喇。

除此之外，當時競逐建築、測量及都市規劃界別嘅姚松炎仲收過公民黨郭榮鏗競選辦公室5蚊捐贈，清楚寫明係7月18日成立「專業聯盟」記者會印咗30份新聞稿嘅費用，每份1蚊咁計，30份就要30蚊，最後由6個加入聯盟嘅參選人平分，所以得出每人有5蚊捐贈嘅數字。佢另外亦收到總共4.4萬捐款。

至於之前曾經申報無收過捐贈，之後又改番「有收捐贈」嘅鄉議局主席劉業強；翻查申報資料，原來佢收過經民聯2607元嘅選舉捐贈，不過立法會網頁上嘅紀錄，仍然只見到劉業強申報「有」收過捐贈，至於「捐贈人姓名」同「數額」嘅欄目，仍然只見「稍後提交」等字眼。

更多港聞

持特區護照到馬達加斯加 落地簽證留90日

【明報專訊】香港人習慣一有假期就出遊，去嘅地方愈嚟愈多選擇。入境處噚日就宣布，持特區護照嘅話，又多一個國家給予免簽證或落地簽證待遇，就係非洲... 詳情

下周氣溫最低20℃

【明報專訊】上星期香港經歷狂風暴雨，噚日天色就明朗得多，連雲彩都「閃閃生輝」，最高氣溫曾經去到30℃，十足過緊夏天咁。不過，天文台預測下星期... 詳情