公職王曾掌選管會監察截聽 自言非「政府中人」
現年70歲的胡國興(胡官)於2012年退休，他於2011年退休前受訪時曾稱因太孤獨故不留戀法官工作，亦認為「唔可以戀棧權位」，因人不在位，別人「睬你都傻」，雖然多次獲委公職，惟他明言自己不是政府的人。
胡國興除了法官身分外，過去亦有公職王之稱，歷任多年選舉管理委員會主席、首任截取通訊及監察事務專員等，並處理過多項調查，包括於1996年調查嘉利大廈大火、1998年調查新機場混亂事件、2007年調查香港教育學院風波等。
不少市民多只記得胡官巡視選舉票站時的嚴肅表情，或是狠批執法部門違規截聽通訊的敢言模樣，其實他也有幽默一面，如2011年他接受本報訪問時，稱雖多次獲政府委以重任，但自言「I am not a government man(我不是政府的人)」，認為公職多只因自己「認叻」及「唔會托手㬹」的性格，才會屢接熨手山芋幫政府拆彈。
被問到退休後會否留戀法官之位時，胡官稱：「你不在位，無咁嘅權勢，好多嘢都係畀面，唔係實質㗎。你唔可以戀棧權位，有位就有權，無位就無權，如果離開咗司法機構，唔通仲返去同同事食早餐？仲好似senior(長輩)咁嘅口脗同佢哋講嘢？你都戇居，睬你都傻。」
他形容法官工作很有趣，但工作量太大，笑言退休後也不會對法庭「心掛掛」，因為當法官的日子「太孤獨」，「喺上訴庭好啲，見到兩個(上訴庭法官)，飲咖啡傾兩句」，他說平日法庭秘書不敢騷擾他，也很少打擾他， 「已唔知佢個樣係點」。他又指自己比其他法官「更孤獨」， 「其他法官會食早餐，我唔會㗎，乜都唔講，我又唔social(交際)，飲咖啡做乜?」
胡官曾表示身為法官，一直堅守按法律原則判案，同時相信有天理，表明即使心裏覺得犯人有罪，但因法律原則要將之釋放也不會耿耿於懷， 「佢食得禾米多，日後會衰得再大鑊啲，佢返嚟就判重啲，走唔甩嘅」。他認為若不按法律原則判決，他日犯人若上訴成功，反會令有道理一方要賠訟費，徒勞無功。
