【明報專訊】立法會選舉啱啱結束，外界期待特首選戰會逐漸浮面。不過早前因為去杭州參加G20而錯過立會選舉嘅財爺曾俊華，就再度「遠走高飛」，拉大隊再到中亞考察「一帶一路」，首站就係哈薩克斯坦嘅阿拉木圖(Almaty)，其後再到首都阿斯塔納(Astana)，會見當地官員、商界等。

首站哈薩克斯坦

今次嘅商界團組成都好多元化，同行邀請30幾人中有唔同界別人士，包括建築、工程、法律、IT、港鐵等，連啱啱當選議員嘅經民聯張華峯同民建聯葛珮帆(EQ)都馬不停蹄，獲邀一起出發。不過Emily發現，隨團仲有一個稀客，就係被視為頭號「梁粉」嘅專業聯盟主席劉炳章。唔知呢位上屆梁振英競選辦公室副主任同財爺共度4日3夜，會有乜嘢玄機呢？

大家會唔會好奇財爺去當地做咩？EQ噚日一早上機前，就拉埋財爺喺機場做facebook Live直擊，話準備去了解當地金融、基建、運輸、物流、科技等方面發展。相信接住落嚟嘅行程，EQ都會積極為網友送上。