唔打告急牌 「支持嘅人會支持」 長毛走勻全港幫戰友拉票
【明報專訊】今屆立法會選舉完結,噚日好多候選人選情告急嘅聲音好早出現,但有幾個候選人就「定過抬油」,唔係好緊張咁為自己拉票,反而游走港九新界,為其他黨友或戰友着急,例如選超區嘅民建聯李慧琼同出戰新界東嘅社民連梁國雄(長毛)。
吳文遠憂心「叫過佢唔好嚟」
身邊唔少戰友都好擔心長毛嘅選情,但長毛噚日先走勻港九新界,幫社民連同人民力量嘅選舉聯盟拉票,直到噚晚7點幾先返去沙田街站做選舉宣傳。Emily忍唔住問長毛驚唔驚最後唔夠票,但佢話「支持我嘅人就會支持」,所以無諗過告急,反問「如果選舉為告急,咁選嚟做乜?」參選九龍西嘅社民連吳文遠都話,見到長毛不停跨區幫人拉票,都擔心佢選情,仲話「叫過佢唔好嚟,佢夾硬要嚟」。
除咗幫人站台,長毛又講到自己反對「雷動計劃」,認為選民嘅投票意向唔應該被干預,利用樣本不足、唔準確嘅民調做「棄保」同配票,係「盲人騎瞎馬,夜半臨深池」,認為計劃對民主選舉嘅原意有歪曲。
另外,參選九龍西嘅普羅政治學苑黃毓民,噚日都有走勻港九新界5區,幫熱血公民同香港復興會拉票,佢同樣話唔擔心選情、唔使告急。民建聯主席李慧琼朝早都有去九龍東,同當區參選嘅柯創盛一齊拉票。