督察協會爭警員可申請遲兩年退休

香港警務督察協會換屆後第一次同傳媒見面，左起﹕事務執行委員任廣發、內務秘書長郭溢樑、副主席曾昭顯、主席李占安、秘書廖奇新、司庫黃美愉及事務執行委員蕭孝良。（利君雅攝）

【明報專訊】香港警務督察協會剛剛換屆，隨即向會員同傳媒公布大計，重中之重係希望公務員事務局劃一畀所有警務人員達退休年齡後都可申請延遲兩年退休。

6月底公務員事務局已實施嘅新退休安排，所有公務員包括紀律部隊人員，可申請嘅延後退休日數，由以往90日放寬至120日，但據新任主席李占安透露，𠵱家警察退休年齡限於55歲，高級助理處長至處長可做多兩年到57歲，唔少同事都想好好運用經驗繼續服務警隊；由於𠵱家申請延遲兩年退休只有某些年份入職同職級嘅人先有資格申請，上級再按佢哋表現同體能審核，所以督察協會提出「漸進式延長退休年齡安排」，先提倡公務員事務局劃一申請，希望所有警察同事都有權利申請延遲退休。

李占安又話，唔係個個同事都會爭住申請延遲退休，但始終希望大家有同等權利申請，又話近年警隊雖然有退休潮，但傳承工作做得好，無青黃不接問題，「係咪傳承做得好就唔需要畀應有權利呢？」督察協會嘅朋友話，公務員事務局不時有同佢哋開會，話遲啲有細節，但未知趕唔趕得切喺今屆政府任期完之前收到好消息。