張國鈞表演5下引體上升 姚松炎踩車爭單車徑

民建聯主席李慧琼（紅衣者）同副主席張國鈞（左五）噚日喺港島出席選舉拉票活動，同其他黨友一齊舉起奧運五環標誌，象徵團結同盡力打好選戰。

中大學者姚松炎（前）噚日由西營盤踩單車到灣仔，爭取完善單車徑，唔知佢9月又踩唔踩到入立法會呢？

【明報專訊】里約奧運開鑼，唔少立法會選舉候選人都借住呢股體育熱潮幫自己宣傳。出戰港島嘅民建聯張國鈞(Horace)，噚日同參選超級區議會嘅黨主席李慧琼(Starry)搞拉票活動，近幾個月刻意為選戰減磅嘅Horace更即場顯身手，喺街頭做咗5下引體上升，落地時就好似體操運動員咁揚起雙手，攞足姿勢分。

范國威都打單車牌

奧運咁多項運動入面，Horace話自己最鍾意足球，因為足球係團體運動，就算實力唔夠對手強，只要打出士氣同夠齊心，好多時都能夠以弱勝強。Starry就話自己最鍾意排球，形容打排球有隊形嘅話，就可以團結爭勝。佢哋噚日同多個候選黨友一齊展示奧運五環標誌，唔知民建聯喺今年選舉又會攞到幾多個「金牌」呢？

另一邊廂，出戰「建築、測量、都市規劃及園境界」嘅中大學者姚松炎，噚日就由西營盤踩單車去灣仔，爭取完善規劃單車徑，佢相信完善單車徑可以令業界參與更多基建項目，亦可以改善空氣質素同推動綠色生活。姚松炎嘅選舉對手有謝偉銓同林雲峯。

參選新界東嘅范國威，噚日亦喺馬鞍山用單車宣傳拉票，話要爭取改善單車徑配套設施，例如飲水機、單車停泊處及洗手間等。其他候選人名單詳見表。

更多港聞

家有「實驗兔」 黃友嘉﹕佢識安慰人

【明報專訊】強積金管理局主席黃友嘉（右三）噚日出席寵物活動，佢同Emily透露屋企養咗隻白兔仔叫「Pillow」，當正兔仔係家人。黃友嘉話「... 詳情