方國珊扮小智 張超雄精靈上身

由「哪吒」變身「小方」嘅立法會新界東參選人方國珊，噚日一身寵物小精靈入面嘅小智打扮，喺政總門常開前影相。（方國珊facebook）

張超雄就用收服卡做咗張廣告，招義工同捐款，希望新界東選民投佢一票，等佢喺新一屆立法會繼續做「比卡超雄」。（張超雄facebook）

【明報專訊】Pokémon GO嚟咗香港之後，大小朋友齊齊落街捉小精靈，連前日颱風妮妲殺到，大家都繼續化身訓練員，唔怪得連立法會參選人都要借呢個遊戲宣傳吓自己啦！

今年新界東參選人之一、綽號「哪吒」嘅方國珊，噚日就喺facebook變身小精靈訓練員「小方」，話要收服破壞香港幸福嘅「小精靈」。「小方」唔止著咗寵物小精靈主角小智套衫，喺政府總部「門常開」前面影咗張相，仲拍片解釋佢呢個選舉廣告。「小方」話，佢呢個「Povemon Go」原意取自Poverty(貧窮)，嚟緊佢就要捉一啲破壞香港幸福嘅小精靈，例如「領展蝙蝠、港鐵海盜、立會懶豬及咸蛋超淫」。

除咗小方之外，同區參選人仲有個「比卡超雄」，佢就係張超雄。張超雄整咗張「收服卡」宣傳品，話自己係比卡超雄，呼籲大家成為義工、捐款同投票支持佢。張超雄話今次呢個二次創作嘅選舉廣告，係呼應《版權(修訂)條例草案》，希望自己入番議會，繼續做隻比卡超雄，同網民繼續同步。兩個參選人創意就有喇，唔知市民受唔受落呢？