怪醫11萬項修正案被拒 批主席「隨心所欲」
[2016.06.27] 發表
【明報專訊】醫學界議員梁家騮(怪醫)為星期三嘅二讀審議改革醫委會嘅《醫生註冊(修訂)條例草案》，早前提交逾11萬項修正案，但立法會主席曾鈺成就一條都唔批，話因為唔符合議事規則，怪醫噚日出席活動時話對裁決感到遺憾，唔接受曾鈺成「隨心所欲」嘅決定，強調自己從來無拉布，對主席嘅裁決，佢話「人在做，天在看」。
怪醫噚日終肯透露點樣製造11萬項修正案，佢話政府提出嘅第11項條文牽涉8項變數，按組合機會，衍生有11萬項修正案，所以佢覺得提出11萬條修正案係合理。佢話唔明白曾主席用咩準則決定係咪符合議事規則，又質疑法案委員會馬虎了事，只為遷就政府盡快通過修訂。
曾主席出席活動時就回應話，提出11萬項修正案好難唔係「瑣屑無聊」，又話梁家騮未有用書面文本提交修正案(怪醫並無將佢11萬項修正案印出嚟，而係將一個涉及40幾萬頁紙嘅電子檔案，用USB交去立法會)，係唔合乎議事規則。佢重申批出修正案「無分派別」、「不理優劣」，只係按議事規則決定。
更多港聞
廣告學生創業 擁抱失敗賺經驗 銀行僅餘13元 拍片兩年賺10萬
【明報專訊】4名香港高等科技教育學院（THEi）廣告學士課程學生掏10萬元，買最基本的拍攝器材、租用工廈小單位創業，以市價六折為商戶拍片。「... 詳情
相關新聞
