【明報專訊】噚日立法會三讀通過《截取通訊及監察(修訂)條例草案》，不過Emily睇返投票紀錄，發現工聯會陳婉嫻(嫻姐)無跟建制派隊形，投咗反對票。原來嫻姐係忙中有亂投錯票，佢解釋，自己當時喺議員辦公室籌備活動，但樓下會議廳又審議緊草案，當三讀表決鐘聲響起，佢就落樓投票，撳掣之後頭都冇拎轉就返上去辦公室繼續做嘢。 嫻姐話，佢當時冇意識到自己投錯票，以為撳咗贊成掣，到記者提起，先知自己撳咗反對掣，但已經無得補救；佢強調自己贊成草案，「連泛民都支持，有乜理由我反對？」其實今次已經係嫻姐一個月內第二次投錯票，上月底佢喺全體委員會表決另一條條例草案嘅修正案，亦錯投反對票。嫻姐上次立即道歉，今次佢亦都講聲「唔好意思」。 鄧家彪未收過父親節禮物 另外，工聯會鄧家彪(阿彪)噚日喺會議廳外向男女記者派「玫瑰花」，不過望真啲，原來係一支花形嘅原子筆，上面寫住「爸媽我愛你」嘅英文字句。阿彪話，早喺母親節已經製作咗幾千支筆落區派街坊，而嚟緊父親節前夕就會派埋「貨尾」。阿彪有個7歲嘅囡囡，但佢話阿囡未送過父親節禮物，唔知今年會唔會識做，𧨾下爹哋開心呢？
|
| |
| |
;){kind=small}
;){kind=small}
;)
