【明報專訊】各大泛民政黨同民間團體一如既往，前晚都趁六四喺銅鑼灣同天后一帶擺街站籌款，剛剛成立嘅「香港眾志」雖然網上口碑有啲負面，但無阻佢哋嘅吸金力，主席羅冠聰話前晚籌到約45萬元。Emily統計過，眾志嘅金額係有擺街站嘅非建制政團之冠。而社民連除咗港紙，都收到100萬陰司紙，主席吳文遠笑言，下次去中聯辦示威時會用咗佢。

小麗民主教室籌逾8萬

公民黨籌到28.7萬元，較上年微跌萬多元；工黨籌到大約9.5萬元，同舊年差不多；社民連籌到22.6萬，比去年微跌2.4萬；「小麗民主教室」都籌到逾8萬元。

至於民主黨，依舊都係一蚊都無。大家唔好以為佢哋無人支持，只係佢哋堅持已故民主黨黨鞭、支聯會前主席司徒華嘅傳統，民主黨成員喺六四只會為支聯會籌款，呢個傳統至今無變，所以民主黨咪無喺六四為個黨籌款囉。

後生仔嘅吸金力都係勁，香港眾志雖然同學民思潮無關，但前者嘅核心人物如秘書長黃之鋒都係前學民人，如果參考「學民思潮」籌款達33萬嘅成績，今年眾志成績真係唔錯。