【明報專訊】主張「要本土不要分離」嘅立法會議員鍾樹根(Tree Gun)，自從畀黨拒絕出戰港島，講嘢愈來愈放、百無禁忌。樹根噚日喺電台節目透露，今個月尾到報名前會決定喺咪同民建聯「分離」，又大膽爆咗民建聯「不能說的秘密」，話民記上屆立法會選舉有做票站調查，方便配票。佢透露喺上屆選舉，下晝6點透過票站調查知道民建聯夠票，所以呼籲義工去幫工聯會拉票。不過，按照選舉事務處資料，民建聯無申請做票站調查，而按照指引，其他有申請做票站調查嘅機構，唔可以喺投票結束前透露個別候選人票數。

自比譚耀宗「將切嘅一粒瘜肉」

究竟樹根講嘅票站調查資料係咩，究竟有無人違規呢？對於黨友爆料，民建聯葉國謙初時話「唔知」，其後強調「民記無做票站調查」。咁係咪變相話樹根講大話？葉國謙就無回應，只係話「你問佢」，葉又話「我先係權威」。

樹根喺節目度仲自比係前主席譚耀宗(譚sir)嘅「一粒瘜肉」，主持人追問「被切除未？」佢話「我諗都將近切緊」。佢直認冇問候過譚sir，認為如果事件屬實，「可能係長者，所以畀佢快啲做」，又指現今社會唔應該有咩特權。佢嘅連串金句，令到在場幾個主持人笑聲不斷。

田大少fb提議葉劉讓路樹根

除咗一眾網民關心樹根去向，連自由黨榮譽主席田北俊都幫樹根出招，喺facebook建議佢叫新民黨主席葉劉淑儀唔好選，讓返個港島位畀民記出番兩隊，「皆大歡喜！選民選你好過啦」。不過識睇一定睇hashtag，田毛毛就tag咗「#有人目標志在特首#你先係親生仔#振作啊」，網民都留言話呢個真係「Hashtag」。葉太就同Emily講「無回應」。