《明報》兩報道獲人權新聞獎 特赦組織倡多報弱勢權益

第20屆人權新聞獎噚晚頒發，明報攞到兩項中文突發新聞優異獎。得獎報道包括〈智障男三稱「無推伯伯」〉〈二哥淚下：盼社會尊重殘障者〉，得獎記者為張煒明、錢瑋琪、曾映妹及鄭佩珊。另一得獎報道係〈長者遭脫光露天等冲涼〉，得獎記者係廖穎琪同蔡傳威。

〈智障男三稱「無推伯伯」〉〈二哥淚下：盼社會尊重殘障者〉

〈長者遭脫光露天等冲涼〉

【明報專訊】由國際特赦組織香港分會、外國記者協會同香港記者協會主辦嘅人權新聞獎，今年踏入第20周年。《明報》今屆攞到兩個中文突發新聞優異獎，得獎作品包括張煒明、曾映妹、鄭佩珊、錢瑋琪舊年報道嘅〈智障男三稱「無推伯伯」〉〈二哥淚下：盼社會尊重殘障者〉，同埋廖穎琪、蔡傳威嘅〈長者遭脫光露天等冲涼〉，Emily恭喜咁多位得獎嘅同事及前同事。

今年適逢「人權新聞獎」成立20年，回顧香港人權狀况咁多年嘅轉變，國際特赦組織香港分會總幹事區美寶話，人權問題牽涉多方面，好難整體評估香港人權狀况係咪倒退，但佢話近年香港嘅新聞自由同集會自由令人擔憂，尤其係前年雨傘運動警方使用過分武力。佢又提到《明報》早前突然解僱執總姜國元，質疑喺報道調查巴拿馬文件之時解僱姜，時間上讓人憂慮。

而喺20年間，參賽嘅作品亦由以往集中六四集會同示威遊行等，逐漸擴大到性小眾、雙非學童等議題，區美寶話傳媒愈來愈理解人權嘅定義，但仍然要多報道弱勢社群嘅權益，增加大眾對人權嘅認識。