梁志祥貼改圖 「那一天行李會飛」

建制派梁志祥喺fb貼咗一隻龍蝦同頌昕嘅改圖，題為「那一天行李會飛」，圖中「龍蝦」仲同頌昕講「接住喇」。梁志祥並留言﹕「以後唔好再咁大頭蝦啦！咪搞到老豆（竇）又孭鑊先得㗎！」（梁志祥facebook截圖）

【明報專訊】國泰職員幫特首個女梁頌昕攞行李事件鬧得熱烘烘，成班官員喺立法會解釋都話以往一路有咁嘅情况，而湯家驊都喺facebook貼文，話自己真係遇過，覺得今次件事「弄大了」。

「過來人」湯家驊話事件「弄大了」

湯家驊喺facebook貼文話，自己3年前同太太去沖繩旅行，回程過安檢後喺候機室內準備登機，先發覺遺留手機喺租賃車上，經日本機場人員代為通告，租車公司搵番佢部手機，仲特別派人將手機送返機場，再由工作人員攞入禁區還番畀佢。前年佢同太太去北海道，又漏咗iPad喺飛機度，其後都係由香港機場人員由禁區帶出嚟交還。湯家驊話，兩件事中機場人員都唔知佢係議員，佢哋只認為係職責所在，又話「梁振英不是一位好特首，對他絕無好感，但以上事實令人懷疑他女兒的事件係弄大了」。

唔理係咪「弄大了」，連建制派梁志祥都出嚟抽水，喺fb貼咗一隻龍蝦同頌昕嘅改圖，題為「那一天行李會飛」，圖中「龍蝦」仲同頌昕講「接住喇」。梁志祥並留言﹕「以後唔好再咁大頭蝦啦！咪搞到老豆(竇)又孭鑊先得㗎！」

一向好文采嘅長毛梁國雄喺立法會財委會特別會議即席作咗首詩送畀頌昕，話佢唔係有特別需要，唔應該獲「特事特辦」，「公主無懷孕，頌昕非傷殘，本來應循例，何必要特辦」，唔知讀者覺得長毛作得好唔好呢？