「三次創作」 拍「真•梁靚芬」MV 梁美芬想開區議員滅鼠班
[2016.02.22] 發表
【明報專訊】經民聯立法會議員梁美芬講明會多用facebook及社交媒體，拉近同年輕人距離，原來佢農曆新年前拍咗段賀歲MV短片，大玩「三次創作」，組成「真•梁靚芬社區合唱團」，將聖詩《主能夠》改編成《真能夠》，又唱又跳舞，而梁美芬不單親自填詞，仲喺MV中開腔rap番段。不過，呢段破格嘅短片一直hold住無放上網，原來係因為大年初一晚旺角發生暴力衝突，社會氣氛唔係咁開心，所以佢暫時將啲喜慶短片放埋一邊。
梁美芬話，今次呢首《真能夠》由佢改編填詞，又話毛記電視將佢改名「梁靚芬」，個名改得好好，所以要三次創作一下。佢都算認真製作，去咗專業錄音室錄音，MV就拍咗幾個鐘先搞掂，而MV中佢都戴cap帽唱歌。梁美芬話正考慮呢幾日將呢段MV「翻生」，但唔知到咗今日元宵先上載短片會唔會過時喎。
歡迎青年新政參加
梁美芬最深入民心嘅應該係「鼠王芬」呢個稱號。佢噚日同傳媒團拜聚會時就話，選舉對手成日話要消滅「鼠王芬」，其實係搞錯咗，話大家應該要齊心消滅老鼠先啱。佢話近期見到唔少區議員都貼海報，話社區鼠患嚴重，所以佢又有新主意，已同之前佢請來香港幫助滅鼠嘅內地滅鼠大王李鏡就聯繫，有意請大師來港為各區議員開班，教大家滅鼠48式。佢話好歡迎區選時嘅對手，包括青年新政鄺葆賢及游蕙禎等人一齊參加喎。
更多港聞
相關新聞
