【明報專訊】新一年新開始，市民首先面對嘅可能係衣食住行加風四起，Emily統計過，唔少旅遊景點、交通同日常使費都喺元旦加價。其中海洋公園加價11.6%，成人票價由345元加到係385元，小童票價由173元加到193元。昂坪360亦加價，成人來回門票加12.1%至185元，小童來回門票加11.7%至95元。另外，迪士尼樂園舊年11月已宣布加價8％至9%。 引入按尺寸收費 郵費加6.2% 交通方面，車主可能會叫苦連天，因為大老山隧道第九年加價，平均加幅11.9%，其中私家車加18%，即係每程加3元，收20元。房委會轄下超過120個停車場亦加價，私家車車位平均加租約4%，月租加至1130元至2430元不等；時租加1元，「日泊」同「24小時泊」則加價5元。 香港郵政亦係兩年內再次加價，郵費由元旦起平均加價6.2%，並且由以往按重量計收費做法，改為按尺寸收費，以30克或以下本地郵件為例，「小型郵件」維持現時郵費1.7元，但「大型郵件」就要加價至2.9元。 電費7年首次減費 不過，市民亦有少少佳音嘅，因應國際油價回落，今年電費將會稍減，中電減0.9%，七成住宅客戶每月電費最多減4.4元；港燈減1.1%，超過七成住宅用戶每月電費最多減7.5元，係兩電7年來首次減電費。
|
| |
| |
;)
