婚宴攝影師吃炒飯呻慘

【明報專訊】大家有無聽過乜嘢係crew meal呢？婚宴本來係開心事，但係Emily喺網上見到有婚宴攝影師，就因為擺設婚宴酒店所提供嘅膳食而好唔開心，當事人仲影低放上網呻(圖)。當網民見到辛苦嘅工作人員，每人只得一碟好似無乜材料嘅炒飯做晚餐，都忍唔住留言，話覺得佢哋好慘。

當事人係婚宴攝影師，前晚喺facebook上載咗一張有4碟瑤柱蛋白炒飯嘅相。據了解，呢啲炒飯就係當晚W Hotel婚宴工作人員嘅膳食，但睇落去4碟飯有啲一片白茫茫，見到有少少切片菜莖，嬲到當事人質疑：「其實W Hotel有無當過Crew係人？」有網民認同，仲幫手鬧W Hotel「不知所謂」，又話睇相「唔好話瑤柱，蛋白都搵唔到」，又貼圖到W Hotel嘅facebook專頁求回應。

酒店：素菜婚宴先咁安排

W Hotel噚日回覆Emily，話因為嗰餐係「素菜婚宴」，先有咁嘅安排，平日會提供廈門炒米、星洲炒米、乾炒牛河等膳食畀工作人員，仲話酒店對呢件事感到十分遺憾，會展開內部調查同檢討。