【明報專訊】快到年尾，大大小小嘅頒獎禮開始舉行。《明報》團隊先拔頭籌，時任偵查組記者嘅廖穎琪(Winky)，憑「長者遭脫光露天等冲涼」嘅偵查報道(下圖)，奪得第七屆中大新聞獎嘅最佳新聞獎(報章/雜誌)大獎。

Winky喺中大校長沈祖堯手中接過獎座後話，其實呢個獎項係團隊嘅，包括時任偵查專題組記者蔡傳威等明報同事嘅合作成果。而最重要係市民肯報料，先成就到呢個故仔。

另外，現明報偵查組資深記者、《東週刊》前高級記者黃詠慈，亦憑喺東週刊時揭發圍標黑幕嘅「大維修系列報道」奪得最佳專題獎(報章/雜誌)大獎。Emily真係替幾位戰友高興，恭喜！

中大新聞獎兩年一屆，評審主要係新聞界嘅老總、新聞總監同埋學者。今屆參賽作品143份，角逐10個獎項，真係唔堅都攞唔到獎！