【明報專訊】社民連梁國雄(長毛)早前出席旺角一個反對《2014年版權(修訂)條例草案》嘅集會，一度被人包圍，質疑佢係咪唔參與「拉布」。長毛噚日喺自己嘅facebook專頁再解釋，話自己雖然無提交修正案，但拉布唔係得一種方式，因為即使唔交修正案都可以發言，所以最重要嘅係「冗長發言」，就住議案同修正案不斷發言辯論，亦可以用點人數嚟拖延。 人民力量陳志全(慢必)噚日雖然身在台北，但亦都透過fb幫長毛講好話，唔滿意有人圍長毛。慢必話，指摘長毛唔肯就草案拉布係「無理失實指控」，又形容自己過去3年幾同長毛「並肩作戰」，發言次數最多嘅一定係長毛。佢話對於集會失焦，由好地地一個「反惡法記者會」，變成「長毛被圍要警察護送離場」，覺得好難受，但就話「相信長毛，他一定撐得住」。 劉慧卿望各方互相尊重 另一邊廂，民主黨噚日表明唔會喺立法會就草案拉布，主席劉慧卿被問到擔唔擔心引起市民強烈反彈，佢回應話唔同意包圍行動，亦唔想立法會內外出現暴力場面或者有人受傷，希望各方可以互相尊重咁話。佢亦表明反對政府提出嘅草案。
|
| |
| |
;){kind=small}
;)
