C朗爆費Sir吹風筒實况 「踢砵踢櫈爆晒粗」
[2015.10.07] 發表
一班人關埋房門，呢度講呢度散，本來好正常，不過當關乎公眾利益，爆料就變得好重要，就好似基斯坦奴朗拿度咁，為了球迷的知情權(即係八卦)，一於大爆前曼聯「波士」費格遜在更衣室的「吹風筒」實况。原來「費蛇」嬲起上嚟，唔止飛波砵，仲會當面爆粗大鬧『×你』。雖然被「問候」，但C朗就話咁先學到嘢，難怪可以變為世界級啦。
「難以置信，但學到嘢」
根據最新標準，「上位」要睇影響因子，捧盃無數費Sir絕對夠班，而有冇問候同僚一項，他亦做到足，難怪上到神枱。
C朗在BBC的紀錄片中，就大爆恩師經常「問候」球員﹕「我記得有時踢得差、或者球隊輸波後，他會踢櫈、踢波砵，乜都踢，水啦、飲品啦，面都紅晒，大鬧『×你，傳波啦』。」
C朗唔介意被粗言「問候」，仲話：「難以置信，但其實係好事，因為我們學到嘢」，最後進化成費Sir口中的4個世界級球員之一。
費格遜欲找傑斯接任
不過，問碧咸可能未必同意，因為「萬人迷」當年在更衣室被費Sir怒踢波砵省中塊面，差點搞到毁容，最後離隊收場。
至於費Sir亦都爆料，認為當年物色莫耶斯繼任曼聯領隊絕對是「Mr. Right」，不過在他心中，真正的Mr. Right其實是傑斯，只可惜時辰未到。「如果傑斯早6、7年退休，假設他35歲，我好可能會請他做我助手，好可能他會直接繼承我。不過我從來不會叫球員退休。」
2013年時傑斯39歲，最後在莫耶斯麾下多踢一季才正式掛靴，全心做尹戈爾的副手。而傑斯被問及此事時，只能驚訝地說「咩話？」，可能心想早點退休，便不用只在莫耶斯被炒後才暫代領軍4場咁少吧。
更多體育
根據《ESPN》報道，首屆足球名宿世界盃將在2017年舉行，門票收益將撥入慈善用途。
不少資深球迷都懷念過去的球星，總覺得今天的球星體...
詳情
相關新聞
