麥記10蚊兩個包排長龍
[2015.08.21] 發表
【明報專訊】麥當勞噚日起舉行為期兩星期嘅「日日開心more」推廣優惠，打頭炮嘅係朝早11點開始供應10蚊兩個漢堡包。Emily中午去九龍灣兩間分店睇過，店內的確幾多人，但有食客話等嘅時間較耐，甚至有人話呢排反而會少啲去麥當勞。
Emily同兩個有買特價包嘅食客傾過。喺九龍灣德福分店嘅陳小姐話，佢本身已經遲咗放飯，點知噚日等特價包搞到仲慢咗，故未必會再幫襯推廣優惠產品，因為等嘅時間真係幾長。今年升中二嘅曾同學話，今次優惠推出嘅包同平時品質差唔多，又話噚日排隊時間確係多咗。
麥當勞用電郵回覆，話今次活動推廣反應熱烈，但銷量情况係商業數字，所以唔會講。
更多港聞
相關新聞
