中港足球戰 門票賣晒未？
[2015.08.19] 發表
【明報專訊】自從畀中國足協話「有層次」、「得防着點」之後，香港足球代表隊嘅波飛就鬼咁搶手。下個月3號香港隊就會北上深圳作客中國隊，波飛噚日下晝開始喺網上公開發售，約一個鐘頭就話賣晒，但去到噚日黃昏，網站唔知點解突然又顯示「售票中」。
足總主席梁孔德就話售票系統曾經出現問題，但佢唔清楚售票情况，所有數字都要等售票系統公司提供。佢又話網站已回復正常，有職員用內地電話號碼同銀聯卡資料，成功登入網站買飛，唔認為事件會影響球迷入場睇波。
呢場全城矚目嘅世界盃外圍賽賽事，喺兩萬幾張公開發售嘅波飛入面，香港隊只獲分配2000幾張，每張賣480元人民幣(約583港元)，連運費就要530元人民幣(約660港元)，香港球迷想買飛嘅話仲要用回鄉證實名登記。
呢場波咁有話題，搞到Emily都好想買飛，於是兩點開始公開發售後就試吓上網購買，可惜登入畀錢個頁面後，網頁就出現空白畫面。球迷組織「香港力量」馮先生就話，唔知個網係咪有咩特別方法，令唔少人嘅電腦過唔到安全指引，搞到諗住買飛嘅過百球迷落空。
更多港聞
相關新聞
