美食博覽人次增2％ 參展商：人流內地客都少咗
[2015.08.18] 發表
【明報專訊】會展嘅美食博覽噚日結束，大會話今年入場人次有42萬，比舊年多2%，但有參展商話感覺人流比舊年少，內地客都明顯少咗，但生意同上年差唔多。有賣日本水果嘅攤位，部分貨品噚日劈價一半促銷。
展商稱本地內地人七三比
做海味生意嘅營運主任冼小姐話今年內地客比例少咗一成，「今年大約七成係本地客、三成內地客，上年嘅比例就6:4左右。」佢話今年最大張單係有本地客用咗3萬蚊買蟲草。
至於專賣日本水果嘅攤位噚日就減價促銷，有員工話貨品平均減價三成，有原本賣50蚊兩個蘋果，噚日減至20蚊兩個，吸引唔少人埋去揀。東莞旅客陳小姐喺美食博覽同朋友各買咗「一車」北海道牛奶，每人使咗兩百幾蚊，佢哋話第一次嚟美食展，因為來港旅行，於是順便湊吓熱鬧。
更多港聞
相關新聞
