網民抽水：若要見工 必先冇胸 政府fb請AO
[2015.08.01] 發表
【明報專訊】政府新聞處喺facebook專頁上載一張招聘啟示，話9月聘請俗稱AO嘅政務主任和行政主任等職位，原本都係提供資訊，應該無乜風險，提醒想搵工嘅市民留意。但網民關心嘅唔係工作機會，而係乘機抽水嘅機會。
招聘啟示出咗一日，已有近300個留言，可謂非常熱鬧，但嘲諷留言就有一大堆，網民借近日熱爆新聞諷刺一番，例如港大盧寵茂跌倒事件、女文員被控以胸襲警及同食水鉛超標等。有網民戲稱如果要見工一定要「插水」、「冇胸」、「演戲」等先有資格做政府工。又有網民留言：「入職條件係唔係要埋沒良知同演藝畢業？厚面皮、智力水平偏低優先？」、「我識扮暈，即係有資格做AO 啦」等等。
當中仲有唔少留言唔留情面，但新聞處個帖至少無突然畀人刪除，算係大方。
更多港聞
相關新聞
