劉業強﹕我過18 唔係世襲
6分鐘改選完 發叔子掌鄉局

新界鄉議局噚日換屆，前主席劉皇發（左二）卸任，其長子劉業強（右二）喺無競爭對手情况下自動當選主席。副主席就由張學明（右一）同林偉強（左一）連任。（余俊亮攝）

【明報專訊】新界鄉議局噚日換屆，選出新一屆正副主席，改選6分鐘就搞掂，皆因前主席劉皇發(發叔)長子劉業強喺無競爭對手嘅情况下自動當選主席；副主席就由張學明同林偉強連任，佢哋任期4年。之前傳身體不適嘅發叔都有現身，雖然佢走動時要人攙扶或用雨傘輔助，但精神同中氣唔錯，好多記者都問佢身體狀况如何，發叔話「幾好」。

被問大計 話要先同副主席傾

劉業強見傳媒時，有記者以英文問佢會唔會覺得自己係「世襲」，而喺外國留過學嘅佢都以英文妙答，話「我已經超過18歲，亦係自己去交表(參選主席)，所以唔係世襲」。至於發叔卸任後會唔會「垂簾聽政」，劉業強話發叔會繼續參與鄉議局會務，但唔擔心佢會垂簾聽政。劉業強仲話，發叔作為好有經驗嘅議員，有時問佢意見都係可以接受嘅。

新任主席劉業強喺兩名副主席陪同下一齊見記者，可能佢未習慣面對傳媒，答問題時都係一句起兩句止，要靠兩個副主席護駕幫佢作答。被問到上任後有咩大計或發叔有無交低咩任務，劉業強就話要同兩個副主席商討先答到大家。至於會唔會出選明年立法會鄉議局功能組別，劉業強就話係言之過早。

發叔精神好 講話全程企

發叔早前去信鄉議局全體委員，話自己年紀大唔會再競逐連任，佢噚日以普通議員身分出席選舉，表明自己「愛鄉愛民之心唔會有絲毫改變」。發叔講話時全程企喺度，中氣唔錯。

張學明話，發叔身為一個79歲嘅長者，行動不便係生理現象，但發叔嘅精神狀態同思維完全無問題，仲話希望發叔可以「操fit啲」，得閒時繼續返鄉議局嘅「吹水館」(鄉議局會堂)吹水。

更多港聞

海洋公園誕港產袋鼠B

【明報專訊】海洋公園噚晚一次過公布喜事同白事，喜事係有新生命誕生，喺今年3月底正式同公眾會面、由南澳洲來港嘅雌性紅頸袋鼠Nano，誕下首隻喺... 詳情

退休張浚生提起香港仍有火

【明報專訊】1998年已經退下香港政治火線嘅新華社香港分社（中聯辦前身）前副社長張浚生，依然心繫香港，一講起香港仍然好好火，佢早前喺杭州接受... 詳情

公民黨出童裝六四Tee

【明報專訊】有關本土爭議，連支聯會嘅「建設民主中國」綱領，近年亦受到唔少挑戰，「六四」今年已經26年，已故支聯會主席司徒華生前都好強調希望能... 詳情

大嘥鬼周日落北區

【明報專訊】立法會環境事務委員會主席、民建聯陳克勤跟開環保議題，噚日佢同北區區議員劉國勳一齊，同「大嘥鬼」喺立法會內開會，講吓嚟緊星期日叫佢... 詳情

初中中史科修訂 半數學校不同意

【明報專訊】教育局課程發展議會轄下的修訂初中中國歷史及歷史課程專責委員會，早前建議將初中近代史的比例，由三分之一增至一半，減少古代史比例，並... 詳情