【明報專訊】不同團體陸續發表政改民意調查，新民黨噚日亦公布佢哋做嘅政改民調，有別於電話訪問，主席葉劉淑儀話今次調查喺上月27至本月8日，於30個地點街頭訪問2773人，不過地點似乎都喺新民黨嘅「樁腳」或有意出選嘅區做，九龍區就欠奉喇。結果顯示，53%受訪者表示支持政改方案，30%話一半半，17%就話反對。 咁樣做問卷，結果可信度有幾高？葉太就話，所有民調都有佢嘅問題，即使大學做，都會有受訪者因為某大學做而拒絕回應，認為所有民調都唔可能絕對準確，佢哋只係想提供參考，又話今次結果係反映地區意見。記者質疑點解民調結果無加權，葉太就話坊間民調其實係咪抽樣、加權都無人知，都係講個信字喎。 帶區議員社區主任曝光 葉太噚日開記者會，帶咗唔少區議員同社區主任一齊公布調查，仲畀機會佢哋輪流講吓街頭做問卷聽到乜嘢街坊意見，其中出席嘅包括大坑社區發展主任王政芝(Gigi)，而新民黨當區區議員黃楚峰就無現身，相信Gigi都好大機會接替黃楚峰參選11月嘅區議會選舉嘞。
|
| |
| |
;){kind=small}
;)
