民記前總幹事加盟無綫新聞
袁志偉：與政治無關
[2015.03.03] 發表
【明報專訊】無綫新聞部近月人事變動多。《am730》噚日報道，無綫新聞原來搵咗已退休嘅民建聯前總幹事陸漢德加入做編輯主任(Managing Editor)，主力負責本地政治新聞審稿工作，噚日已返工。Emily聽聞不少現職或前傳媒中人對此都議論紛紛，無綫前記者柳俊江喺Facebook講起，簡稱ME嘅編輯主任手執極大權力，坐鎮直播，決定邊啲新聞可以出街，中途插播或抽起新聞。
曾任文匯報 將負責政治新聞
Emily聽資深傳媒人講，陸漢德曾任職《文匯報》、1990年代初曾於無綫新聞工作兩三年，之後離開傳媒行業。《am730》引述話陸漢德2004年加入民建聯研究部，2011年任總幹事，民建聯主席譚耀宗確認陸去年退休離開，從沒成為民建聯黨員。新聞總監袁志偉接受該報查詢時，話聘請陸與「七警」事件無關，「我請個編輯都同政治有關？梗係無啦」。Emily噚日未能聯絡上袁志偉及陸漢德。
據知，無綫新聞部噚日唔少人都係睇報紙先知陸嘅聘用，因陸已無從事新聞工作逾10年，之前工作政治色彩濃厚，唔少無綫中人對此感驚訝。現時無綫新聞執行編輯主任係許方暉 ，陸漢德即任其下的編輯主任。據無綫新聞部守則5viii，「其人員不能積極參與一些可能、或被視作可能影響公正報道及編輯的黨派活動」。
另外，Emily聽聞無綫今年暑假實習生數目驟減，由去年20幾個減至4個，當中兩個係內地生，浸大、港大生無分，唔少院校老師正為學生嘅實習機會頭痕。
更多港聞
【明報專訊】反水貨客團體前日發起「光復元朗」遊行，最終演變成警民衝突。北區水貨客關注組發言人梁金成噚日喺港台《千禧年代》話，衝突係因為「愛字...
詳情
相關新聞
