麒麟擺尾 葉劉撞飛
「兇徒」O嘴繼續舞
[2015.02.21] 發表
【明報專訊】新民黨主席葉劉淑儀噚日陪同鄉議局主席劉皇發以及大批鄉紳，一齊去沙田車公廟求籤，但差啲發生「血光之災」。話說一行人由一對麒麟陪同入廟，其中一隻麒麟唔知係咪太興奮，企起身舞動時，突然扭一扭、「pat pat」向右大力一擺，將旁邊嘅葉太撞到打橫飛開，好彩一眾鄉親立即扶住葉太，令佢無跌親。涉事麒麟見狀，瞪大隻眼「O晒嘴」，之後慢慢向後退繼續舞。
鄉紳急「護花」 葉劉話「無事」
葉太後來同Emily講，呢隻麒麟真係好大力，推開咗自己，好彩身邊有好多人頂住同扶住佢，所以「完全無跌親，無事」。
呢隻麒麟高過葉太成個頭，知悉撞低咗葉太後，立即嚇到「跌一跌」兼頭向上，瞪大隻眼、擘大個口望住葉太，好似大叫「大鑊」咁樣。葉太被撞後，有多名鄉紳「護花」扶起，因此可以3秒鐘企起身兼企穩，繼續笑笑口若無其事向前行，所以同行嘅發叔好似無乜察覺異樣。
至於葉太後來有無順便求籤，佢就話自己係基督徒，無求籤，只係受邀嚟陪人求籤。佢又話，黨內好多成員喺沙田，所以嚟車公廟。
更多港聞
【明報專訊】港鐵喺初二初三期間推出特別乘車優惠，市民只要用成人八達通，乘搭任何港鐵本地車程，就可以享受「半價」車費優惠。不過，有精明市民發現...
詳情
相關新聞
