曾鈺成自認缺點有啲「寸」
[2015.02.16] 發表
【明報專訊】?家一講起特首人選，唔少人都會叫立法會主席曾鈺成諗吓，曾主席話對做特首「有一種美好嘅幻想」，相信「如果我做就可以(做好)」。不過佢笑言只係因為自己唔係特首，如果真係做而做到一塌糊塗，缺點弱點就會全部暴露出嚟，「咁就死啦，太沒趣」，所以寧可畀自己一個感覺「只係錯失機會」，好過真係做時，一事無成就慘。
曾鈺成接受黨友、立法會議員蔣麗芸(Ann姐)嘅《蔣麗芸會客室》訪問，喺第二集被問到點解當年本來教書會轉去從政，曾主席笑言可能係「行差踏錯」。佢憶述1985年《基本法》開始起草，當時佢同30多名教育界、文化界人士組成小組，提出方案，更經常與不同立場嘅人，如較保守嘅工商界、民主派開「武林大會」討論。
做過培僑中學校長嘅曾鈺成話，後來喺1991年組黨時都無諗過從政，當時仲有老師叫佢唔好搞搞震，「當時我仲同老師講，放心啦，政黨成立後就會回來(培僑)」，但佢笑言，組黨之後就有人叫佢做黨主席。被問如果可以重來，會唔會從政，曾主席話「我真係唔知道」。
至於有咩建議畀想參政嘅年輕人，曾主席話要諗清楚自己追求乜嘢，同思考自己有何不足，用行動改善。曾主席舉例話知自己怕醜，唔識同陌生人打交道，所以會努力改進。曾主席話，明白做人要謙卑，但自己做過一段時間校長，仲有啲「寸」，講笑話「我仲未戒得甩」。
更多港聞
相關新聞
