謝偉俊評後佔領﹕更珍惜「健康」香港

[2014.12.15] 發表

【明報專訊】隨着銅鑼灣佔領區今日清場，佔領行動可說正式告終。立法會議員謝偉俊噚日就話香港經歷咗70幾日嘅病，?家病完，應該檢討吓係咪平日嘅生活習慣同飲食習慣有問題。佢又話內地同胞曾經歷六四、文革兩次「動亂」，所以?家集中民生發展，但香港人太幸福，只係試過1967年動亂，相信後佔領時期市民會更加珍惜一個「健康」嘅香港。

謝偉俊噚日出席港台《城市論壇》時話，佔領行動反映年輕人嘅聲音被忽視好多年，所以建議吸納年輕人加入諮詢或論政架構，甚至可以喺立法會功能組別設立青年組，等青少年發表意見。

周浩鼎：搞好民生 10個少5個佔領

同場嘅青年民建聯主席周浩鼎就話佔領運動畀咗特首梁振英一個機會，如果佢可以處理好民生問題，就可以重建市民信心。周浩鼎覺得佔領嘅人有唔同原因，但如果搞好民生問題，10個入面可能都會少5個喎。

不過，真普選聯盟召集人鄭宇碩反駁，話目前最重要嘅係為市民爭取基本政治權利，如果做唔到，政府依然會係一個無認受性嘅政府，咁樣即使推任何政策都唔可以解決民生同政治問題。