學聯登十大政團no.1 上榜政團評分唔高

[2014.11.05] 發表

【明報專訊】早前新民黨主席葉劉淑儀話因為近日嘅佔領行動令自己「人氣急升」，但睇嚟呢四個字用喺學聯身上更貼切。事關港大民意研究計劃上月中嘅民調顯示，學聯喺佔中開始後，成為市民最熟悉同最支持嘅政治團體，首次躋身「十大政團」，第二至第五位係工聯會、自由黨、公民黨及學民思潮。

鍾庭耀：佔領致全輸局面

但所有市民認知嘅政團，支持度評分都唔過50分，民意研究計劃總監鍾庭耀就分析，數據顯示佔領運動帶來所有政團全輸嘅局面。

對於得分最高，學聯副秘書長岑敖暉就話，學聯係學生組織，每年都會換屆，絕對唔係政團咁話，亦強調唔會派人參加選舉。

港大民意研究計劃上月中分兩階段，合共訪問2000多名市民，學聯首次跨越認知門檻躋身十大，仲排名第一，達89.2%；喺支持度方面，雖然係最高評分，但亦只有47.7分，而其他上榜政團評分更加全部低於43。

支持度評分方面，對比4個月前，所有連續兩次進入評分階段嘅政團，評分全部明顯下跌。好似工聯會就跌咗8.2分得42.6分，民建聯跌6.2分得40分，民主黨同公民黨亦分別急跌8.8同9.4分，得39.7同41.3分，全部跌至其首次上榜以來新低，亦即1991、1992、1994及2006年以來新低。

躋身「十大政團」嘅先決條件，係市民對政治團體嘅熟悉程度，然後再按支持度排名。「十大」以外嘅政治團體，支持度可以好高或者好低，但由於並唔係市民最熟悉政團，所以唔喺榜內。

更多港聞