【明報專訊】噚日係「保普選反佔中大聯盟」最後一日嘅簽名活動；另一邊廂，喺網上有人貼出灣仔一個簽名活動照片，就係公開「支持周融」嘞，支持曾經話佔中成功會移民嘅大聯盟發起人周融「找數於民 恢復市容 長居英國」，個攤位同橫額嘅設計仲學足保普選反佔中簽名攤位。「幫港出聲」就喺facebook專頁話已經報警處理，又鬧偽冒街站抄襲大聯盟橫額設計。

話已交錢棄居英權

周融噚日同記者講話惡搞佢無咩所謂，佢係一個拎香港護照嘅普通香港人，「香港係我屋企」，會留喺度打呢場仗，又話已經正式放棄居英權，仲同Emily講已經交埋錢辦理手續。

反佔中歌改編《舊歡如夢》

另外，相信大家仲記得撐警歌《香港生命》，噚日Emily喺WhatsApp收到一首反佔中歌《怎堪司法賤似泥》，改編自《舊歡如夢》，首歌好有「老友記」feel，一開始以呂奇腔唱出「緘默嘅終於也要出來 在發聲確是無耐(奈)」，仲有獨白讀出「非法佔中搞亂香港……撕裂香港」，最後唱出「怎堪司法賤似泥」時仲要彈出一張泥地相，表達方式真係好鬼簡單直接，首歌喺YouTube至昨晚有約1000個like。