明報 > 新聞 > 港聞

MK不是MK 金鐘不似預期

[2014.10.01] 發表
佔領運動示威者果然物盡其用，金鐘除咗有部巴士被佔據作救護站，一部被迫停泊喺旺角彌敦道及旺角道交界嘅巴士，更變成「民主牆」，唔少市民貼上自己訴求，巴士披上一身「白衣」，成為旺角最新「景點」。（余俊亮攝）
旺角彌敦道前晚一度變咗足球場，佔領咗咁耐，有市民起身運動一下，除埋鞋落場踢波。（葉家豪攝）
民主黨立法會議員胡志偉踩單車經過被當成畫布嘅馬路，上面寫上唔同標語，仲有藝術家喺中環同金鐘干諾道中一帶路面畫上花花，名副其實「遍地開花」。（鄧宗弘攝）
噚晚中環落大雨，示威者就話可以雨來傘擋，但有當值警員就要照頭淋守住鐵馬，全身濕透。（胡景禧攝）
銅鑼灣樓上酒吧「Flat 61」前晚起開放畀示威者用，方便佢哋如廁、充電、休息等。老闆娘Wings話對政治持中立態度，但見示威者被防暴警察這樣對待，希望可以提供方便，「我都係香港人，幫到佢哋好值得，舉手之勞，成件事好緊要，生意少啲唔緊要」。Wings話前晚已有超過100人借用洗手間，有人借地方開會商量策略，亦有倦極嘅人上嚟飲水，好快就伏喺枱上瞓着，「其實大家都辛苦，都想快啲過去」。（林俊源攝）
佔領者除咗自發將垃圾分類，有人仲喺政總集會收集果皮，話加水可製作酵素，如此一來可以避免果屑吸引蒼蠅，而3個月之後，呢啲酵素物仲可以當清潔劑使用?。（梁卓怡攝）

【明報專訊】佔領行動遍地開花，各區參與佔領嘅人除咗靜坐叫口號，都各自有唔同活動，唔少人就以輕鬆一啲嘅形式「快樂抗爭」，喺日與夜之間唞唞氣。

Emily同好多同事呢幾晚都喺唔同地方採訪，好似前晚深夜，喺銅鑼灣鵝頸橋就有抗爭者幫襯「睇相」占卜，未知係咪問緊香港前程；亦有唔少人喺街頭郁動吓，踢波、塗鴉、揸住結他向女友大唱情歌等。另一邊廂，好多人入夜都要回一回氣，有人索性通宵留守席地而睡，亦有人離開陣地去附近免費提供場地嘅cafe休息，人同手機都要「叉叉電」。

彌敦道變咗「硬地足球場」，港島馬路變成我手寫我心嘅「黑板」，呢幾日嘅香港，MK(旺角)不似MK、金鐘不似預期，變得好超現實。

更多港聞
示威橫額Copy Cat

示威橫額Copy Cat

【明報專訊】警方噚日話自己日前無向示威者舉「開槍」牌，只係警告橫額雙面有字，係攝影機角度問題；夏愨道噚日就有市民仿效警察「停止衝擊 否則使... 詳情
政總之外警民有偈傾

政總之外警民有偈傾

【明報專訊】噚日朝早政總外警力明顯減少，氣氛平靜，一名外籍警官（白衣）偕同僚往視察時，就有唔少示威者主動上前查詢警方幾時清場，雙方態度客氣。... 詳情
站外鐵馬搬走 多得港鐵職員

站外鐵馬搬走 多得港鐵職員

【明報專訊】警方施放催淚彈當晚，警方用港鐵列車運載大批警員，示威者便合力喺金鐘、銅鑼灣等佔領區域用鐵馬堵塞一些出入口，以防警員從出口清場。噚... 詳情

明報網站 · 版權所有 · 不得轉載
Copyright © 2014 mingpaotor.com All rights reserved.
Ming Pao Daily News A wholly owned subsidiary of Ming Pao Enterprise Corporation Ltd.
Toronto Chinese Newspaper

1355 Huntingwood Drive, Scarborough, Ontario, Canada M1S 3J1 | Tel.: (416) 321-0088 | Fax: (416) 321-9663 | Advertising Hotline Tel: (416) 673-8250