無綫﹕港姐無提名限制
被嘲「完美演繹普選框架」
[2014.09.02] 發表
【明報專訊】《2014香港小姐競選決賽》前晚結束，今年無綫以「港姐冠軍由你話事」做宣傳，話可以畀觀眾一人一票選冠軍，但唔少網民其後對取得15.6萬票、高票當選嘅15號邵珮詩奪得冠軍有質疑，話無綫喺決賽當晚，先由大會5個「星級評判」喺10名佳麗中選出最後三強，先畀觀眾再投票，根本就係「有篩選」，嘲笑無綫「完美演繹」全國人大常委會通過嘅特首選舉框架。
無綫外事部副總監曾醒明就大感無奈，佢話港姐賽制一早就白紙黑字寫咗，參賽港姐一早知道，加上港姐係綜藝節目，同政改比較好似唔係幾啱。佢仲笑說，如果真係要比較，港姐可以有唔同人提名「入閘」，都無提名限制！
曾醒明又提到，前年佢哋因為全民投票同評判投票各佔一半比重，結果太多人投票搞到伺服器down咗，佢哋汲取教訓改善，今年亦一樣，會參考觀眾意見。
話觀眾顧住靚女 評判會考智慧
決賽當晚，被視為大熱嘅11號吳凱欣被「星級評判」篩走，三甲不入，網民批評同政改框架相似，因為市民喺篩選下未能為心儀港姐投票；但曾醒明就話，觀眾可能會顧住選靚女，但評判會接觸佳麗，考佢哋智慧，呢部分都好重要，所以由星級評判最後選出三甲，做法合理，令冠軍符合智慧與美貌並重。
冠軍邵珮詩噚日接受訪問時，就形容港姐選舉公平，好光榮自己係香港人，「知道好多人想一人一票表達民意，但我認為每個人都要學識包容」，仲話希望自己能成為年輕人榜樣。
更多港聞
【明報專訊】香港做事講制度、規矩，大家都會尊重，但全國人大副秘書長李飛噚日就自爆點樣體現內地官場文化。話說佢噚日下午會見傳媒，開場白並唔係講...
詳情
【明報專訊】有智庫公布全港首個全面「育兒成本計算機」，畀有意生育嘅人簡單計算由媽媽第一日懷孕，直至仔女22歲，喺本地大學完成首個學位課程所涉...
詳情
相關新聞
