【明報專訊】四年一度嘅世界盃上個月已經結束，喺比賽舉行期間，懲教署為免院所內在囚者暗中賭波，作出一啲針對措施，噚日喺赤柱監獄介紹畀Emily等一眾行家睇。

懲教署人員話，有在囚者除咗用香煙賭波，重用埋薯片糖果做籌碼落注。另外，佢哋提到，有賭癮大嘅囚犯會用信紙、膠片自製賭具，例如啤牌同「紙麻雀」等。

檢960包煙 「黑市」值16萬

總懲教主任(審核及保安)屈柏衡話，世界盃舉行期間，署方喺各監獄院所，進行399次搜查行動，其中30次喺晚上進行，檢獲23件自製賭博工具，有28張波纜紙同落注用嘅960包香煙。佢話，估計呢批香煙喺獄中嘅「黑巿價」達16萬元，31個犯人涉及賭錢被紀律處分，當中16人係非法賭波，其餘就係參與投注六合彩等。

懲教署話，賭錢嘅犯人會被罰「取消減刑」、「扣減工資」等，相信搜查行動後，院內賭風已有所遏止。另外，懲教署同東華三院平和坊合辦「戒賭輔導小組」，喺赤柱監獄做試點，為有病態賭徒特徵嘅在囚者輔導，有22人參加。