【明報專訊】《主場新聞》關閉，71個前《主場》博客成立《主場新聞博客群》，繼續分享前博客新文章，另有網上廣告人就成立另一個《主場新聞 支持佢撐下去！》新平台，打算搞網上媒體。唔知係咪網民都被搞到亂晒龍，《主場新聞博客群》噚日發表聲明，表明從未要求、亦不接受公眾捐款，又話成立《博客群》平台，只係方便舊《主場》讀者追蹤喜愛博客嘅文章。

另一平台認班底無《主場》成員

《博客群》話，成立《博客群》專頁係為咗諗住延續主場精神，仲喺度商討緊下一步計劃，暫時未有計劃重建《主場新聞》，又強調網民閱讀同轉發佢哋博客嘅文章，就已經係畀佢哋最大嘅支持。

另一邊廂，旨在建立新獨立網評平台嘅《主場新聞 支持佢撐下去！》專頁，就喺專頁回應，話《博客群》聲明無針對佢哋，毋須對號入座，又話會同《博客群》繼續保持良性互動，唔排除合作。佢哋承認班底無《主場新聞》成員，但新平台財政營運獨立，無政治背景，現已有20多名主場博客同佢哋主動聯絡，話願意供稿，新平台名稱亦會盡快公布。