【明報專訊】民建聯北區區議員劉國勳噚日喺facebook，上載咗一張同教育局長吳克儉會面嘅相，並寫咗「對牛彈琴」四個字，之後仲話「吳克儉局長也太無能了，我覺得他應該下台」等等。原來劉國勳之前收到30幾個本地家長投訴，話仔女喺新學年要由粉嶺跨境去打鼓嶺禁區返學，於是佢同吳局長傾吓有咩解決辦法，點知傾完得個「桔」，搞到劉議員好勞氣。 傾解決跨區讀書得個桔 Emily睇過劉議員同局長會面張相，在場仲有民建聯主席譚耀宗、立法會議員陳克勤，同埋另一個北區區議員姚銘，佢哋同劉國勳去政府總部向吳克儉獻計，例如建議喺粉嶺區幾間小學每班加收2、3個學生解決。不過，姚銘話吳克儉講明「政策上解決唔到」，傾咗大半個鐘都無方案。劉國勳仲同Emily講，話「欣賞CY(特首梁振英)政府唔畏懼……可惜吳克儉就係嗰啲畏懼、唔做嘢、唔係一個負責任嘅官員」。 兩個區議員好勞氣，但陳克勤就話叫局長落台只係劉議員個人立場，重申呢個唔代表民建聯整個團隊嘅立場。
|
| |
| |
;){kind=small}
;)
