【明報專訊】民建聯一直希望吸引年輕人、專業人士入黨，繼早前拍短片賣廣告，近日又出書，訪問咗19個年輕黨友，講吓佢哋點為理想拚搏或做好地區工作等，書中訪問唔係個個都hard sell民建聯有幾好，反而講生活多，有意用軟性手法吸引年輕人入黨。

陳恒鑌：執垃圾執到另一半

民建聯新書叫《理想．您想》，立法會議員陳恒鑌喺訪問中透露，佢畢業後因為好奇，所以去做地區工作，第一個活動就係去超級市場執垃圾，喺活動中認識咗𠵱家嘅太太，笑言老婆係「執垃圾執番嚟」。佢又話2003年對佢好大衝擊，當時試過被人用粗口問候，令佢3日唔敢開街站，後來都學到堅持、忍讓。

民建聯秘書長陳學鋒就透露，佢叫學鋒，原來爸爸改名時想佢學雷鋒精神，全心全意為人民服務，於是佢畢業後就入民建聯，做咗議員助理8年，後來先當選區議員。深水埗區議員鄭泳舜近年醉心長跑，書中訪問亦講自己點樣練跑同比賽，試過喺球場跑足3個鐘、80個圈，佢話跑步令佢變得積極堅毅，同佢喺民建聯學到嘅一致，相信默默耕耘總有成效。