【明報專訊】國泰航空響應「築福香港」運動，噚日邀請咗特首梁振英(CY)見證百多個低收入家庭學童及家長搭飛機，仲請埋記者上飛機採訪，奈何機艙通道較窄，記者難有位採訪，好彩警方要員保護組(G4)睇到，仗義幫電視台記者拎咪啫。 CY同小朋友「迎難」大力跳 CY上任後頻頻內交，但佢噚日致辭時話自己做特首後唔可以再時常享受搭飛機，仲自爆未做特首時，差唔多每個星期都搭一次飛機出差，一計之下發現自己嘅飛行里數約相當於圍繞咗地球飛80幾個圈！「迎難而上」掛口邊嘅CY仲請咗兩個小朋友同佢一齊挑戰地心吸力「大力跳」，比喻雖然脫離地心吸力「好艱難」，但只要大家「不怕難」，一步步地做、日復日咁做，就不斷有進步。 CY同小朋友一齊天空之旅90分鐘，當中只得約20分鐘喺機艙內同參加者近距離接觸。國泰解釋，飛機升降都要時間準備，已盡量安排雙方交流閒談。原來記者同參加者嘅距離會更加遠，記者想問參加者搭飛機感受，不過國泰就一度溫馨提示活動後會安排採訪環節，佢哋仲好隆重其事咁整咗個採訪官員先會用嘅「咪兜」畀參加者用，唔通諗住畀參加者一嘗做官滋味？
|
| |
| |
;){kind=small}
