【明報專訊】近期只要有泛民人士去台灣，大家都變得好敏感，第一時間就會聯想到「勾結台獨勢力」。不過民主黨主席劉慧卿就無有怕，下周三會去台灣出席「世界自由民主聯盟」舉辦嘅論壇，卿姐印好晒幾日嘅行程，以及與會者名單開誠布公，強調名單上一個「台獨分子」都無㗎！ 去年10月，工黨李卓人、真普聯召集人鄭宇碩同佔中三子之一嘅朱耀明，去咗台灣同被視為係「台獨」分子嘅施明德見面後，引起軒然大波。卿姐今次主要會同當地學者及政界人士分享選舉經驗，同對中國大陸嘅睇法。至於會唔會擔心「台獨分子」參與論壇，卿姐大笑咁話，「可能成條街都係」。 台灣外交部長林永樂、台北市長郝龍斌、新北市市長朱立倫、台灣立法院長王金平，都會參與一連4日嘅論壇。另外，對於中聯辦回請立法會議員，卿姐話「已經無晒聲氣」，佢就建議由政務司長林鄭月娥安排雙方見面，成事機會應該大啲。
|
| |
| |
