【Emily】銀髮餐飲優惠券「添食」 今次到早餐
[2025.06.28] 發表
【明報專訊】政府年初舉辦「愛心食肆 賞你惠食」計劃，派餐飲優惠券畀長者。勞福局長孫玉菡噚日宣布，下個月會推出第二輪活動，今次就轉派早餐券，每人有一套6張，比上次多一張，銀髮族憑券去指定飲食集團，可以用15元食早餐。今次同上次一樣，會派5萬套，一共30萬張券。
除咗上次都參與嘅大家樂、大快活、太興、美心同麥當勞，今次仲有銀龍茶餐廳加入；上次長者可以用25元食指定招牌菜，例如焗豬扒飯。飲食界立法會議員張宇人話，年初活動效果理想，使用率達76%，而7月天氣炎熱，希望老友記習慣朝早出門歎早餐，到10月天氣涼啲，就計劃做下午茶優惠。
孫玉菡話，餐券會喺200幾間社署資助嘅長者中心派發，參考上次經驗，受惠者男女比例大約1比2，大約15%餐券派咗畀非長者中心會員。
更多港聞
【明報專訊】大家上禮拜六經過蘭桂坊，唔知有無見到一班巴西舞者喺街頭載歌載舞呢？錯過表演嘅市民𠵱家有機會喇！首屆「香港巴西狂歡節」噚日至聽日...
詳情
相關新聞
